Dylai'r adolygiad ynni wrthod y morglawdd mawr dros yr Hafren

22 Mai 2007

Dylai'r cynnig i adeiladu morglawdd mawr Caerdydd-Weston gael ei wrthod gan y llywodraeth oherwydd byddai'n achosi niwed arwyddocaol i'r amgylchedd, yn cyfyngu ar lwybrau llongau i rai porthladdoedd, ac yn atal datblygu systemau newydd. Dyma'r neges i'r llywodraeth gan Gyfeillion y Ddaear Cymru cyn cyhoeddi'r Adolygiad Ynni yfory.

Meddai Neil Crumpton, Ymgyrchydd ar ran Cyfeillion y Ddaear Cymru:

"Mae'r prif wleidyddion yn dweud bod pob opsiwn a chyfuniad o dechnolegau ynni'r llanw yn cael ei ystyried yn Aber Hafren. Ond mae'n ymddangos bod morglawdd Caerdydd-Weston yn cael ei ffafrio gan rai pobl er gwaetha'r dynodiad amgylcheddol o'r radd uchaf sydd ganddo a'r pryderon cynyddol ynglŷn â llwybrau llongau sydd gan weithredwyr porthladdoedd o gwmpas Avonmouth. Yn wir, mae Morglawdd Caerdydd-Weston yn cael ei ystyried fel prosiect datblygu economaidd anferthol o'r radd flaenaf yn ogystal ag un sy'n cynhyrchu ynni, a hynny er gwaetha'r effaith negyddol posibl ar Avonmouth.

"Fel dewis arall i Forglawdd Caerdydd-Weston gellid darparu morlynoedd llanw mawr, o bosibl ar y cyd â Morglawdd Shoots sydd hefyd yn gallu cynnal cyswllt trên newydd o Lundain i dde Cymru. Mae'n bosibl y gallai cyfuniad o gynlluniau fel rhain gynhyrchu yr un maint o ynni â Morglawdd Caerdydd-Weston heb atal llwybrau llongau neu ddifrodi'n ddifrifol yr ecoleg brin a gwarchodedig sydd ar gael yn Aber Hafren."

Am fanylion pellach, cysylltwch â Chyfeillion y Ddaear Cymru ar 029 20229577