Llywodraeth leiafrifol Llafur yn methu ar bwnc newid hinsawdd

6 Meh 2007

Mae Cyfeillion y Ddaear Cymru wedi cyhuddo Llywodraeth Cynulliad Cymru o fethu a wynebu pwnc newid hinsawdd yn ei rhaglen ddeddfwriaethol ar gyfer trydydd tymor y cynulliad a gyhoeddwyd heddiw gan Brif Weinidog y Cynulliad, Rhodri Morgan.

Meddai llefarydd ar ran Cyfeillion y Ddaear Cymru Gordon James:

"Fis Chwefror eleni pleidleisiodd Cynulliad Cymru yn unfrydol y dylai pwnc newid hinsawdd gael y brif flaenoriaeth gan Lywodraeth y Cynulliad[1]. Mae'r datganiad heddiw gan Brif Weinidog y Cynulliad wedi methu a chyflwyno unrhyw ddeddfwriaeth i gyflawni'r bwriad hwn.

"Fe ymddengys fod Llywodraeth Cynulliad Cymru wedi anghofio mai'r weithred yn ei Gynllun Gweithredu Strategol Gyntaf yw gosod targedau uchelgeisiol i leihau allyriadau nwyon tŷ gwydr.

"Er gwaetha'r holl rethreg gan wleidyddion ynglŷn a'r angen i weithredu ar bwnc newid hinsawdd mae allyriadau yng Nghymru yn dal i gynyddu. [2]. Dyma sefyllfa gywilyddus inni fod ynddi ac yn neilltuol felly am fod y dystiolaeth wyddonol bellach yn achosi pryder inni [3]."

NODIADAU

1. Ar Chwefror 7fed, 2007, cefnogodd Cynulliad Cymru'r cynnig hwn yn unfrydol:
   "Bod Cynulliad Cenedlaethol Cymru yn cydnabod mai'r her bwysicaf yn wynebu y Cynulliad Cenedlaethol yw lleihau effeithiau newid hinsawdd ac mae'n credu y dylai hyn ddod yn brif flaenoriaeth Llywodraeth y Cynulliad."
2. Mae'r data gwyddonol swyddogol diweddaraf yn dangos bod allyriadau nwyon tŷ gwydr wedi codi am dair blynedd yn olynol rhwng 2002 a 2004, a bod allyriadau carbon ddeuocsid yn uwch yn 2004 nag roedden nhw ym mlwyddyn sail 1990 er gwaetha'r ymroddiad gan lywodraeth yn ganolog i dorri ar lefel yr allyriadau gan 20% rhwng 1990 a 2010.
3. Dangosodd astudiaeth gan Academi Gwyddorau UDA ar Fai 22ain godiad mewn allyriadau carbon ddeuocsid o tua 3% y flwyddyn yn ystod y degawd hwn. ô'i gymharu â 1% y flwyddyn yn ystod y 1990au. Golyga hyn fod y cynydd hwn yn gyflymach na'r sefyllfa waethaf a amlinellwyd gan y Panel Lywodraethol ar Newid Hinsawdd. (IPCC). Nodwyd o'r blaen bod adroddiadau'r Panel Llywodraethol ar Newid Hinsawdd yn rhoi amcangyfrif swyddogol. oherwydd yr angen i gael consensws gwleidyddol ymhlith y gwledydd sy'n ymwneud â hyn. Ond awgryma'r astudiaeth ddiweddaraf hon gan Academi Gwyddorau UDA nad yw'r rhagolygon arswydus am gynaeafau gwael, cyflenwadau dwr sy'n lleihau, ia sy'n dadmer na rhywogaethau sy'n diflannu yn debygol o bwysleisio beth yn union yw'r bygythiad i'n byd o bell ffordd.

Am fanylion pellach, cysylltwch â Chyfeillion y Ddaear Cymru ar 029 20229577